Psalms 105

1TOPA tungah lungdam ko-in a min lo unla; ^a
ama sepsate, minamte lakah kitheisak un.
2 Amah la sak un, amah phatna la sak un; ^b
ama nasep lamdang teng genkhia un. ^c
3 A min siangtho thangta hen;
TOPA a zongte lungsim nuam ta hen.
4 TOPA le ama hatna enin;
ama maitang zong den un. ^d
5 Ama sepsa a lamdangte, ^e
ama nalamdang bawlte le a genkhiat a thukhennate, ^f
6 no a nasempa Abraham suante aw,
no ama teelsa Jacob’ tapate aw, phawk gige un. ^g
7 Amah eite Pasian, TOPA hi-a;
a thukhennate leitung khempeuh ah a om hi.
8 Amah in a thukhunsa phawk tawntung a, ^h
a thupiaksa kammal khang tulkhat dong a phawk hi,
9 tua in Abraham tawh a bawl thukhun ⁱ
Isaac tungah tomlo-a a thuciam ahi hi.
10 Amah in Jacob tungah thukho-in kipsakin, ^j
Israel tungah tawntung thukhunin kipsak a: ^k
11 “Nang tungah tanga na luah dingin ^l
Canaan gam kong pia ding hi,” ci hi. ^m
12 Amaute tawmkha bek pha uh a, ⁿ
tawm takpi-in tua lai-ah mikhual suak uh a, ^o
13 gamkhat pan gam khat, ^p
kumpi-gam khat pan adang khatah a pai kawikawi uh hi.
14 Amah in amaute kuama nuainet ding phal loin; ^q
amaute a khual kumpite tai a: ^r
15 “Ka sathau nilhte lawngkha kei unla; ^s
ka kamsangte nasak kei un,” ci hi.
16 Amah in leitang tungah kialpi samsuk a, ^t
amaute an ngahna khempeuh suksiatsakin;
17 amaute mai-ah mi khat sawla -
sila bangin Joseph a kizuak hi.
18 Amaute in kol bulhin a khete kolhsak uh a, ^u
a ngawng ah sikkualte tawh khihin, ^v
19 ama magensate a tunkim mateng,
TOPA’ kammalin amaan a hina a lah matengin a tua cih uh hi. ^w
20 Kumpipa in amah khah dingin mi sawl a,
mite ukpa in amah suaktasak hi. ^x
21 Amah in a innkuan sung ukpa-in koih a,
a neihsa khempeuh uksakin
22 ama lungkimna bangin a kumpitapate lamlaksak a, ^y
a upate pilna a hilhsak hi. ^z
23 Tua ciangin Egypt ah Israel lut a;
Ham gam ah Jacob, pemta-in a teng hi. ^aa
24 TOPA in ama mite pungsak mahmah hi;
a galte adingin a tam lua zahin bawla,
25 ama mite mudah dingin amaute lungsim heisaka, ^ab
ama nasemte a sawmsimsak hi. ^ac
26 Amah in ama teelsa Aaron le
a nasempa Moses a sawl hi. ^ad
27 Amaute gel in amaute lakah ama lim lamdangte bawl uh a, ^ae
a nalamdangte Ham gamah a bawl uh hi. ^af
28 Amah in khuamial sawlin tua gam a mialsakna -
amaute in ama thute a lehdo man uh hi lo hiam? ^ag
29 Amah in a tuite uh sisan suaksak a, ^ah
a ngasate uh a sisak hi.
30 A gam uh uiphuk dimsak a, ^ai
amau gam-ukte lupna inndei sungah a kahto hi.
31 Amah kam pau a, thopi le cippi honpi ^aj
a gam sungteng uh a tung hi. ^ak
32 Amah in guahtui gialtang suaksakin
amau gam sung tengah khua phiasak hi; ^al
33 a lengguite uh le a theikungte uh denggawpsakin ^am
amau gam sunga singkungte a dengpalhsak hi.
34 Amah kam pau a, kaukhup ^an
le kauphe sim zawhloh a tung hi; ^ao
35 tuate in gam sunga singkung le lohing teng gaitum a,
a lei hoih panun a piang teng gaikhin hi.
36 Tua ciangin amaute gam sunga ta masa khempeuh,
pisal pana gahmasa khempeuh a vatlum hi. ^ap
37 Amah in ngun le kham tawh Israel paikhiatpih a,
amau behte lakah a gina lo khat beek a om kei hi. ^aq
38 Israel kihtakhuaina amau tungah tung ahi manin ^ar
amaute a paikhiat uh ciangin Egypt-te a nuam uh hi.
39 Amaute tuam dingin meiipi kaisak a, ^as
zana a khuavak dingun mei a pia hi. ^at
40 Amaute in ngen uh a, vamin pia-in ^au
amaute vantung anlumin a taisak hi. ^av
41 Aman suangpi khangkhamsak a, tui kikhawhkhia-in, ^aw
sehnel-gam ah gun bangin a luang hi.
42 Ahang in, amah in a nasempa
Abraham tunga a kamciamna siangtho a phawk gige hi. ^ax
43 Amah in a mite lungnuamtakin paikhiatpih a, ^ay
ama teelsate nuama kikona tawh paikhia uh a;
44 amaute tungah minamte’ gamte pia-in
midangte thalawhsa gamh luah uh a -
45 tua pen amaute in a thusehte le a thukhamte
a zuih theih nading uh ahi hi.
TOPA phat un. ▼

▼ 45 Hebrew in Hallelu Yah

, ^ba